Эмээ минь

Нэгэн өдөр эмээ маань “Миний охин энэ тогоотой сүүг хөөрүүлээрэй, би үнээгээ саахаар гарлаа” гээд гарч одов. Өмнө нь сүү хөөрүүлж үзээгүй балчирхан би яахаа мэдэхгүй хэсэг алмайрч байгаад “Хурдхан шиг буцалгаж орхиё”гэж бодоод галаа өрдөж гарлаа. тэгтэл тогоотой сүү яах ийхийн зууртгүй халин дэвэрч тэр хавиар нэг юм болов. Хамаг сүүгээ дэврээж асгаад , дээрэс нь тогоогоо нүүрс болтол  түлж  орхисон би эмээгээ орж ирэхээс өмнө үлдсэн сүүгээ саванд юүлчхээд, түлэгдсэн тогоогоо яахаа мэдэхгүй харж байтал ирж яваа харагдав. Айсандаа зүрх түг түгхийн цохилж эмээгээ орж ирэхэд нь орны хөндий доогуур шургаад орчхов. Эмээ минь загнаж эмээлгүйгээр барахгүй харин ч орон доогуураас  аргадан дуудаж гаргаад “Миний охин тогоогоо угааж цэвэрлээд , хүйтэн усаар сайн сойж байгаад сааж ирсэн сүүгээ хөөрүүл. Ажил хийж байгаа хүн алдаж онож байж л сурдаг юм. Нэг сайн зөв  сураад авсан байхад сурсан эрдмийг хүн авчих биш”гэж билээ. Тэгээд миний угааж цэвэрлэн , хүтэн усаар сойсон тогоонд эмээ минь сүүгээ шүүж хийгээд “Сүүгээ зөөлөн галаар хөөрүүлдэг юм, хөөрүүлсэн сүүгээ сайн самарч хөөсрүүлэн, галаа цогшуулан дээр нь байлгаж байгаад хөөргөж хонуулбал зузаан сайхан өрөм тогтдог ” гэж зааж өгёөн юм. Нээрээ л маргааш өглөө нь тогоонд шаргалтсан сайхан өрөм тогтсон байсан. Шинэ өрөмөө боорцогтой хольж идэхэд үнэхээр амттай, салахын аргагүй сайхан. одоо ч аманд амтагдах шиг болдог юм. Эмээ өрмөө саванд хурааж , түүнийгээ үхрийн давсаг ,хонь ямааны гүзээнд хийж сэрүүн газарт хадгална. Намар, өвөл, хавар өрөм зөөхийгөө хураан авсан цагаан тосоороо хайлан амттай сайхан хайлмаг хийнэ. Бас шар тос гарган авч богийн олгойд хийгээд хадгалчихна. Эмээгийн минь гарын хайлмаг миний амьдралдаа идэж үзсэн хамгийн дээд амттан билээ. Би юм бүхнийг хийж үзэх сэн гэж дурлах сониуч бяцхан охин надад эмээгийн минь зааж сургасан бүхэн тэр үедээ шинжлэх ухааны нээлтээс өөрцгүй монгол хүний эзэмшвэл зохих  мэдлэг ухаан байж дээ.  Аарц буцалгаж, ааруул тавихыг ч эмээгийнхээ хажууд харж дуурайж оролдсоор сураад авсан. Эмээ минь тэр бүхнийг хийнгээ зааж сурган, бүхий л нарийн ширийнийг хэлж өгдөг сөн. Тэр бүхний зах зухаас өөрийн болгосон би их азтай . Монголынхоо бүх эмээ нарт ач ,зээ бид хайртай шүү.

Family and people.mn